SHILLONG, Nailur 30: Ka Chief Secretary ba thymmai jong ka Jylla, ka Kong Rebecca Vanessa Suchiang ka la pynpaw ia ka jingthrang ban don ki samla Khasi ki ban iakhun ia ki examin Civil Service, ha kaba ka la kyntu ia ki khynnah ban mih shakhmat na ka ka exam Civil Service, ha kaba ka la ong ruh ba mynta la phra snem ym shym don shuh ki samla na ka Jylla kiba pass ia katei ka exam, hadien jong ka Kong Isawanda Laloo kaba la pass ha u snem 2013.
Kane ka ophisar rangbah jong ka Jylla kaba dei ka kynthei ba nyngkong ban poi haduh kane ka kyrdan ka la ong ba da ka jingdon jong ka ha ka shuki ophisar ba hehduh ka Jylla kan lah ban long ka nuksa ba ki samla kin shim, ba kin thrang ban iakhun ia ka Civil Service exam, ha kaba ka la ong ruh ba kam dei kaba eh hynrei ka donkam tang ka jingtrei shitom.
Ka kong Suchiang ka la ong ruh b aka Sorkar ka la shim khia ban pynshlur ia ki samla ban iakhun ia ki exam da kaba la buh ruh mynta u snem i aka jaka pyntbit ne ka coaching center ha MATI ha kaba la ai jinghikai haduh 110 ngut ki samla bad ka la pynpaw ka jingkyrmen ban a katei ka jaka kin mih ki ophisar mynta u snem.
