10.6 C
Shillong
Wednesday, December 6, 2023

KA LONGKMIE KHASI BA NYNGKONG, KONG R.V SUCHIANG KA LA SHIMTI IA KA SHUKI CHIEF SECRETARY KA JYLLA

HEADLINES

SHILLONG, Nailur 30: Ka kong Rebecca Vanessa Suchiang (IAS) mynta ka sngi 30 Nailur ka la shimti kum ka Chief Secretary  ba pura ka Jylla hadien ka jingshongthait  noh u M.S Roa.

 

Kum ban shu pynkynmmaw ba hadien ki 49 tylli ki snem ba ka jylla ka la ioh ia la ka jylla kaba pura, ba ha kum kane ka sngi, kong Rebecca ka la  kynjoh ia uwei na ki mawmer ban long ka longkmie Khasi ba nyngkong na ri Lum Jaintia ban kiew haduh kane ka kyrdan Chief secretary jong ka jylla.

 

Haba kren bad ki lad pathai khubor ha ka sngiu b aka shimti ia ka kam, ka Kong Rebecca ka la ong ba u mawmer ba ka la kynjoh ha ka jingim ka jong ka um dei ban shu kut noh, pynban ka ka la pynpaw i aka jingkyrmen ba hadien habud yn dang don shuh shuh ki riew kynthei ne ki ophisar  Rangbah ki ban dang iai bteng ban kiew ne ban bat ia kane ka shuki ophisar ba hakhlieh duh jong ka jylla.

 

Ka Kong Rebecca ka ong ruh ba kin bun bah ki jingtynjuh kiban wan kah ia ka lynti treikam ka jong ka kum ka ophisar ba Rangbah, hynrei ka sngew skhem ba da ka mynsiem iatreilang jong ki para ophisar yn lah ban pyniaid beit ia ki kam ki jam.

 

Shuh shuh ka la ong ruh ba ka jinglah ban don ka jong ka la kham slem ha kane ka kam bad  ka jingioh ban iatrei lang bad ki Rangbah ophisar kiba kham hashwa ka la pynsan pynrangbah bha ia ka bor pyrkhat ka jong ka ban shimti pat ia kane ka shuki.

 

Halor u pud u sam bad ka shongsuk shongsain, kane ka ophisar rangbah ka la ong ba ia u pud u sam, yn hap ban ap ia ki kaidphod na ki komiti ba la thung da ka Sorkar, katba ia ka shongsuk shongsain, ka la pynsngew ba donkam ban kham pynbha namar kumba ka long mynta kam da long kaba shngain, hynrei ka la pynpaw ruh ia ka jingkyrmen ba kan nym don pat kano kano ka jingjia kaba sngewsih.

 

Haba phai pat sha ki kam ba hakhmat eh bad ki thong kiba ka don, ka Kong Rebecca ka la pruid dak ia ka pule ka puthi, ka koit ka khiah, kiba long ki bynta kiba kongsan tam kiba kum ka ophisar ba Rangbah kan ialeh ba kan khmih bniah bad shong bishar sani bha da kumno ban lah ban pyntyllun kham sted ia ka kam ha kine ki bynta bad bynrap lang bad kiwei kiwei ki kam kiba sahteng, ia kaba kan iai buddien bad trei shitom ban pyndep ia ki.

- Advertisement -spot_img

More articles

LEAVE A REPLY

Please enter your comment!
Please enter your name here

- Advertisement -spot_img

TRENDING