SHILLONG, RISAW 07: Mynta ka sngi uwei u dkhot ka seng kiengatiar ka Hynniewtrep National Liberation Council (hnlc) u la leit ban pyndem noh ia lade ha ki bor ka ain ha East Jaintia Hills District.
Na ka liang u Myntri Rangbah ka jylla, u Conrad K Sangma u la pynthikna ia kane ka khubor ba uwei u dkhot ba hakhmat ka HNLC u la leit ban pyndem ia lade ha khliehriat, bad bynrap ba ki pulit kin sa phah ia ka report bad yn sa pyntip ruh sha ki lad pathai khubor.
Katkum ka khubor ba la ioh utei u dkhot ka hnlc u dei uba la tip kyrteng da u emanuel suchen, bad uba la shah kem teng ruh mynshwa halor ka jingsuba donkti uba donkti ruh ha ka jingpynbthei ia u bom ied ha ka karkhana star cement. hadien u la leit phet rieh noh sha assam bad wan pyndem pat mynta ka sngi.
Utei u dkhot ka hnlc u la leit ban pyndem noh ia lade mynta ka sngi ha u additional deputy commissioner bad u sp ka east jaintia hills district.
Na ka liang u Bah Lahkmen Rymbui uba dei u myntri kam pohïing ka jylla u la iathuh ba u Suchen u dei uba donkti ban pynbthei bom IED ha Star Cement bad ha Khliehriat police reserve.
Haba kylli u Bah Rymbui u la iathuh b aka jingwan pyndem noh ka lah ban dei hadien ka jingthwet kaba jur jong ki pulit, hynrei u la ong ba kaba kongsan ka dei na ka jingiatreilang ki pulit bad kiba ha ïing kiba la pynshlur ia u ban ieh noh ia ki kam pyntriem. Ha kajuh ka por u Bah Rymbui u la kyntu ruh ia kiwei ki dkhot ka HNLC ban wan pyndem noh ha ka ain bad sdang ia ka jingim ba thymmai.
Ha kaba ia dei bad ka jingjia buh bom hakhmat ka ophis jong ka NPP, u Bah Rymbui u la iathuh ba ki pulit ki la kem hynnin ka janmiet ia uwei u briew, bad u dei uba la tip kyrteng da u Ksankupar Kharkongor na ka shnong Umphyrnai.
