SHILLONG, Risaw 07: U Kyrtong ka Congress ha ka election shiteng samoi na Mawryngkneng, u Bah Highlander Kharmalki u la ong ba ka jingmih ki khubor halor ka jingiapher jingmut u president ka Meghalaya Pradesh Congress Committee, u Bah Vincent H Pala bad u nongialam ka Congress Legislature Party (CLP), u Dr Mukul Sangma kam don jingiadei eiei bad ka election ha Mawryngkneng, hynrei u la ong pat ba ka jingmih jong ki nongialam ka party ban kyrshan ia uwei pat u kyrtong kan don ka jingmyntoi ia ka Congress ha Mawryngkneng.
U Bah Highlander u la leit ban thep kyrteng mynta ka sngi na ka bynta ka election shiteng samoi ka ban sa long ha ka 30 tarik mynta u bnai, bad ka jingiakhun pyrshah kan long beit bad u kyrtong ka NPP, u Bah Pyniaid Sing Syiem uba dei ruh u MDC ka Sohryngkham.
Haba kylli halor ka jingrai ka UDP ban kyrshan ia u kyrtong ka NPP ha Mawryngkneng, u Bah Kharmalki u la ong ba ka u la dei teng u kyrtong jong ka UDP bad ka PDF, bad kiba bun ki nongkyrshan jong kitei ki party kumba 75 percent ki la don bad ka Congress ha Mawryngkneng.
Haba kylli shuh shuh ia ki mat treikam, u kyrtong ka Congress u la ong ba ha ka Jylla la sakhi ba ka rukom treikam bym ia dei shuh bad ka juk kaba mynta ha jan baroh ki tnat treikam ka Sorkar.
