11.1 C
Shillong
Thursday, February 22, 2024

LA PHAH PYNKYNRIAH IA KI BRIEW NA THEM METOR, HAPOH SHI TAIEW YN SHIMTI NOH KA SORKAR IA KA JAKA

HEADLINES

SHILLONG, RISAW 07: U Myntri Rangbah ka Jylla, u Conrad Kongal Sangma u la ong ba ka Sorkar kan sa shimti hi noh ia ka jaka ha sweeper colony (Them Iewmawlong) ia kaba la khmih lynti ban pyndep noh hapoh shi taiew, bad kan sdang ban pynkynriah noh ia ki briew kiba sah ha katei ka jaka.

Ka Kynhun Myntri (cabinet) jong ka Sorkar MDA mynta ka sngi palei ka la iakren sani bha ia ka kaiphot ba la aiti da ka High Level Committee ha kaba ia dei bad ka jingpynkynriah ia ki briew kiba sah ha sweeper colony ne Them Metor.

Haba kren bad ki lad pathai khubor, u Conrad u la ong ba ka HLC ka la batai bniah ia ki jinglong jingman bad ki jingjia ha kaba ia dei bad katei ka jaka, bad ha kaba kut la shim lai tylli ki rai, kata halor ka jinglong trai ia ka jaka namar baroh shi katta ka la don ka jingkulmar halor ka jinglong trai ia katei ka jaka. U la iathuh ba na ka bynta ka jaka la ia soi ia ka sorkular ba lai kynhun (tripartite agreement) ban shimti noh da ka tnat Urban Affairs bad ka Shillong Municipal Board ia ka jaka na u Syiem ka Hima Mylliem, bad bynrap ba na ka bynta ban shimti pura ia katei ka jaka kan shim por sa kumba shi taiew eiei.

U Myntri Rangbah u la iathuh ruh ba ka Sorkar ka la rai ban pynkynriah noh ia ka ophis jong ka Shillong Municipal Board kaba don mynta ha Bishop Cotton Road sha ka ophis treikam baim jong ka MBDA ophis, namar ka jaka ba la buh i aka ophis jong ka SMB mynta ka dei ka jaka sah (Quarter) jong ki nongtrei ka tnat, bad ha katei ka jaka ba don ka ophis yn pynkynriah pat ia ki briew na Sweeper colony.

Katkum ka jingiathuh u Myntri Rangbah, ki don kumba 157 tylli ki longïing kiba sah ha sweeper colony bad kumba 50 percent ki la dep ban mih lypa na katei ka jaka, bad ia kiba dang sah ha katei ka jaka ka Sorkar kan bthah ban pynkynriah noh sha ki jaka ba la pynkhreh.

U Conrad u la iathuh ba kawei pat ka rai ba ka Sorkar ka la shim ka long ba ka tnat Urban Affairs kan pynkynriah noh ia baroh ki briew kiba shong beain ha katei ka jaka sha kawei pat ka jaka ba la pynkhreh, bad hadien kata kan sa pyntip ia ka Sorkar ban shim da kiwei pat ki rai.

Haba kylli halor ka jingpynkynriah ia kiba shong beain, u Myntri Rangbah u la ong ba ka Sorkar ka hap ban pynbiang ia ka jaka namar ki don ki kyndon (procedure) ban pynkynriah ia ki briew na kano kano ka jaka bad ka Sorkar ruh ka hap ban bud ia ki kyndon, bad hadien kata ka tnat Urban Affairs kan sa ai i aka kaiphot kumno ban leh ia ki briew kiba shong beain. Haba kylli shuh shuh halor ka status quo ba la pynmih da ka High Court, u la ong ba ka Sorkar kan hap ban iakhun.

Ha kawei ka liang u Conrad u la ongh ba kane ka kam ka dei kaba la slem bha, bad ban pynbeit ruh ka hap ban shim por, bad bynrap ba kane ka dei ka sien ba nyngkong ba ka Sorkar ka la shim khia ia kane ka kam ban pynbeit noh syndon.

- Advertisement -spot_img

More articles

LEAVE A REPLY

Please enter your comment!
Please enter your name here

- Advertisement -spot_img

TRENDING