Ka National People’s Party (NPP) ka la pynskhem ia u Bah Lamphrang Blah kum u Kyrtong ban iakhun ia ka election shiteng samoi na Mawphlang constituency ka ban long ha ka 30 tarik mynta u bnai, ia u Bah Blah la pynbna kum u kyrtong da u president ka NPP Meghalaya, uba dei ruh u MP sha Rajya Sabha ha ka jing ia don lang u President rangbah u Conrad K Sangma uba dei ruh u Myntri Rangbah ka Jylla, u Symbud Myntri Rangbah uba dei u vice president, u Bah Prestoen Tynsong bad kiwei ki nongialam kiba dei ruh ki nongmihkhmat n aka party.
Haba kren ha ka jingialang kaba la long ha Mawphlang mynta ka sngi, u Bah Lamphrang Blah uba la jop ruh haduh 4 sien kum u MDC ka Mawphlang-Diengiei na ka Congress, u la ong ba ka daw ba pynlong ia u ban rung bad iakhun syndon ia ka election na ka NPP ka dei na ki nongialam ka party ban ai ka jingshakri kaba kham bha sha ki paidbah, bad bynrap b aka dei ka kam ka jong u ban p[eit ba ki nongshong shnong kin ioh ia ka jingkylla namar kum u MDC u shitom ban shakri haba u iohi bun ki jingduna.
U la ong ba u sngew sarong ba ka NPp kaba dei ka National Party kaba dei na kane ka Jylla, hynrei u la ong ruh ba um don jingpyrshah iano iano, bad ka jingleit iakhun ia ka election na ka NPP ka long na ka bynta ban shakri kham bha ia ki paidbah.
Na ka liang u Bah Prestone u la ong ba ka la dei ka por ban pynkiew kyrdan noh ia u Bah Lamphrang Blah namar u dei uba la tbit, bad ki paidbah ki kha tip bha balei ki la pynjop haduh 4 sien kum u MDC namar ba u don ia ka sap, u la ong ba ha ka synshar khaddar ym ju don kata ka sngewlem, bad lada sngewlem leit ha ing ha sem namar bun ki paidbah ki shah ialam bakla ha kum kata ka por.
U la ong ba u Bah Blah uba la jop haduh 4 sien kan eh aiu ban leit noh sha Assembly bad kan eh aiu ba un leit wad ia ki jingkhang hapoh secretariat na ka bynta ki scheme, u la ong ba ka por ka sah sa tang shi snem tam bad tang ban wad ia ki jingkhang ha secretariat hynriew bnai la lut lypa ka por khlem ioh scheme, bad u la kyntu ia ki nongshong shnong ban jied ia u Bah Blah bad u Bah Prestoen un leit wad lang ia ki jingkhang ha secretariat ban suk ki paidbah.
Haba kren ha katei ka jingialang, u Prersident ka NPP, u Conrad K Sangma u la ong b aba ka don ka por ba ka NPP ka don tang 2 ngut ki MLA bad hapoh 8 snem ka NPP ka la don ia ki MLA ha Arunachal, ha Manipur ki don ki Minister bad Nagaland don ki MLA, katba ha Meghalaya ka NPP ka ialam ia ka Sotkar, bad kane ka long namar ka jingshaniah jong ki paidbah namar ka party ka buh hakhmat ia ka bha ka miat jong ki paidbah ka thain NE bad ha ka por ba lyngkot ka NPP ka la lah ban kynjoh sha ka kyrdan ba kiwei ki slem ban poi kata ban long ka National Party, bad watla ka dei ka National Party hynrei ka buh hakhmat ia ka NE.
U la ong ba ha ki 3 snem shiteng kane ka Sorkar ka la iakynduh bun ki jingeh khamtam ha ka suk ka sain kaba lah ban jia bun kiei kiei bad haba don ka jingma la iakren lang bad ki Myntri ha ka Sorkar, bad bynrap ba kine ki dei ki briew lajong kim dei kiba wan na shiliang pud, bad ka Sorak la la rai ban nym leh eiei ka ban wanrah jingma ia ki nongshong shnong. Ula ong ba baroh ki jingjia ki paidbah ki iohi ba kam don ka jingduh jong ki mynsiem briew da kaba buh ia ki briew hakhmat.
U Conrad u la ong ruh ba hynnin ka sngi ka la don ka jingjia kaba eh, ha kaba la thmu da ki kam pyntriem tang ia ka NPP shi sngi shwa ban pyniasoh u Bah Blah, bad u la buh jingkylli ba hato ki tieng ba ka NPP ka la nang khlain na ka por sha ka por, bad bynrap ba dei u Blei uba tip. U la kyntu ia ki nongkyrshan ka party ban long kiba khlain bad ym dei ban pyndem hakhmat ki jingeh ne ki jingbyrngem jongno jongno.
Ha kane ka sngi la ioh ruh ia ka jingkren na kiwei ki nongialam ka party ba kynthup ia u Bah Sngiawbhalang Dhar, u Bah Rowell Lyngdoh uba dei u Symbud Myntri Rangbah barim bad kiwei ki nongialam.
