19.5 C
Shillong
Sunday, July 14, 2024

Ki Jait Nongmih khmat Paidbah bapher bapher da u Babu Kular Khongjirem

HEADLINES

Bun ki paidbah kim da tip bniah eh shaphang ki jait nongmihkhmat paidbah bapher bapher namar tang katto katne eh kiba la ioh ka lad ban leit pule ha ki kyrdan College bad University khamtam ia ka kot ne subjek kaba dei shaphang ka synshar-khadar ne Political Science.Hynrei,ki paidbah ba bun pat ki dei ban tip ia ki jait nongmihkhmat aiu ba ki la ia jied (vote) ha ka por election na ki constituency bapher bapher jongki.

Don lai jait ki nongmihkhmat paidbah(MP/MLA/MDC) ha ka ri synshar paidbah (democracy). Kiba nyngkong eh ki dei kiba hap hapoh ka kyrdan tang kum ki nongshim kabu ia ka jinglong nongmihkhmat jongki(political opportunist).Kine ki nongmihkhmat ki ju mlien ban kylla tdong-tdong, khlieh -khlieh katba ki mon khlem salia ia ki paidbah nong thep vote jong ka constituency jongki.Ki ju mlien ban kylla katkum ka jingkylla ka politic ha kano kano ka jylla ne ka ri jongki.Ki ia syriem thik kum kito ki jait ‘niang bshiah kylla rong(Cameleon). Kine ki jait ‘niang bshiah ki ju kylla rong katkum ka jingkylla dur ne kylla rong ka suin bneng(weather). Lada ka suinbneng ka dum,ki ruh ki long rong dum.Bad lada ka suin bneng ka shai pat,ka snieh doh jongki ruh ka shai bad kumta ter ter.Ki don ki nongmihkhmat paidbah(MP/MLA/MDC) kiba ju mlien ban kylla nongrim man ka por kum u khah kat shaba beh ka lyer shata u phai.Ki shu im sngi beit kliaw tang shano ba don ka kabu sain pyrthei(political advantages), shata,kloi ki phai khmat lai sien-saw sien shi snem ruh kim salia katba jia katba long.Kim neh thiah neh dem ban shong ne don ha kajuh ka party ba ki la don lada kim ioh lad sha kawei pat ka party kaba don ne bat ha ka bor sorkar.Ki pynbeij ia la ki nongkyrshan lajong ba kim lah ban iarap ne ioh jingmyntoi(more development) lada kim ioh rung ne don bynta ha ka party ba don ha ka sorkar(Govt). Kim don bor don buit bad la kut ka nang ka stad jongki ban iarap paidbah lada kim don sha ka liang sorkar.Kum kine ki jait nongmihkhmat paidbah ki long ki nongmihkhmat kiba tad dor tam haduh katta katta(cheapest representatives) ha ka synshar paidbah bad kim da ia pher shuh ia ki ‘Niang bshiah kylla rong’ bad la khot ruh ia ki ha ka ktien nongwei kum kita ki nongmihkhmat Niangbsiah kylla rong ne ki ‘Cameleon type of Representatives. Kiba ar pat kidei kito ki nongmihkhmat ba padiah bad pnah thylliej ban pynbiej bad ai jadu ia ki paidbah bapli ki bym tip ne sngewthuh eh ia kaba dei ne ba lait.Kum kine ki nongmihkhmat pat ki pyrkhat tang na ka bynta ki constituency lajong bad ki duh thiah duh dem ioh rem noh tang shu poi ka Election.Ki leh myn leh(acting) kum ki nongialam paidbah ba stad hakhmat kiwei bad ki lah ban pyngngeit (convince) thik thik kum kita ki nongialam bastad khamtam ia kito ki nongmihkhmat paidbah kiba tlot ha ka pyrkhat pyrdain jongki.Ki nang ban leh(act)la kum kita ki nongialam rangbah hynrei kim don buit ne jingstad(no plan/no policy/no stragegy) ei ei ruh em wat lada ki ioh long mihkhmat na ka constituency jongki baroh shi rta ruh.Ki dei kiba nang ban pynbiej paidbah tang ha ka por Election.Mar ia dep ka Election,kim salia than ia ki paidbah hynrei kin lum spah lum hajar shi kit ia par bad khmih lynti kliaw tang kumno ban kamai spah katba ki dang long nongmihkhmat paidbah.Kum ia kine pat ki jait nongmihkhmat paidbah ki ju khot ha ka kyrdan kum ki ‘Politician type of Representatives).Ki ong hana,lada ai lad ia kum kine ki nongmihkhmat kin lute lut ia ka spah ka hajar bad kin bam duh ia ki nongkynti bad ki jingdon jingem ka ri bad ka jaitbynriew haduh ban da kyrduh bad duk tasam khait ka state bad ka jingbam sap- bam pong( practice of corruption) ruh ka nangjur bad nang shyrkhei katba nang iaid ka por ne samoi. Kiba lai pat kidei ki jait nongmihkhmat paidbah kiba stad pyrkhat,ki riew proh jabieng,kiba iohi jngai(vision),ki bym ju kren kulmar kat shaba lap ba shem ioh shah rkhie bein ha u paidbah,kiba ju im sngi ban pyrkhat ia ka bha ka miat jong u paidbah ba bun balang bad khamtam ban thaw ki ain ki nun bad ki lad ki lynti ban roi bad par ka ri bad ka jaitbynriew baroh solonsar ym tang na ka bynta kane ka juk hynrei ia ka lawei ba phyrnai jong ka pateng ban wan jong jaitbynriew(future generation)ruh kumjuh.Kum kine ki nongmihkhmat kim ju tip ne bna lem ban kamai spah ne thaw pisa ia lade.Kim ju pyrkhat hi ruh ia ka jop ka rem ha ka Election.Ki pynleit jingmut tang ia ka kam paidbah.Ki long paralok ia baroh wat la kidei ki nongshun jongki ha ka por election(political opponents) namar kilong nongmihkhmat lang ia baroh naduh kiba vote ne ki bym vote ia ki ruh.Ki thaw ia ki ain kiban myntoi shisha ia u paidbah bad ki iakhun haduh ban da mih snam ia ka Hok u paidbah nongshong shnong baroh.Ki trei bad shakri hok naduh dohnud ia u paidbah solonsar khlem shah shiliang wat la ki dei na ki constituency bapher bapher ruh.Kim ju long atlukhi hynrei ki sngap ia ka sur ki paidbah namar la jied ia ki da u paidbah.Kim ju kylla ktien ne kylla jutang ioh shah khein ‘riewkai ne ‘riew madan ei kha makha.Ki neh ha kajuh ka nongrim ban shakri ia u paidbah namar ki tip bha ba ‘ka jingkhlain kam shong eh ha ka jingbun paid(quantity) hynrei ka shong ha ka mynsiem ba shynrang(quality). Dei ia kum kine ki nongmihkhmat paidbah kein ba ki khot kum ki nongmihkhmat ba stad bad ba shemphang ne kita kiba ki khot ha ka ktien nongwei kum ki ‘ Statemanship of Representatives’. Kham niar ban ioh ia kum kine ki jait nongmihkhmat khamtam ha kum kane ka juk kyllah kaba mynta.

- Advertisement -spot_img

More articles

LEAVE A REPLY

Please enter your comment!
Please enter your name here

- Advertisement -spot_img

TRENDING