SHILLONG, Risaw 07: Ki ar ngut ki kyrtong ka National People’s Party ki ban iakhun ia ka election shiteng samoi na Mawryngkneng u Bah Pyniaid S Syiem bad na Mawphlang u Bah Lamphrang Blah ki la leit ban thep kyrteng mynta ka sngi na ka bynta ban iakhun ia ka election shiteng samoi ka ban long ha ka 30 tarik mynta u bnai.
Ia ki kyrtong ka NPP la synran lang ruh da ki heh ka party, naduh u National President uba dei ruh u Myntri rangbah, u Conrad K Sangma, u National Vice President u Bah Prestone Tynsong, u President NPP Meghalaya, u Dr WR Kharlukhi bad kiwei ki nongialam ka party.
Haba kren sha ki lad pathai khubor, u Kyrtong na Mawphlang, u Bah Lamphrang Blah u la ong ba lada u shah jied un trei na ka bynta ka roi ka par bad peit ruh ia ka jingeh ki paidbah bad ha kajuh ka por un trei na ka bynta ka imlang ka sahlang.
Haba kylli, u la ong ba ka jingpynieng kyrtong jong ka UDP da u khun jong u MLA barim kan nym ktah ia u bad ki paidbah ruh ki hap ban bishar ia u briew uba lah ban shakri ia baroh kawei ka constituency.
Na ka liang u Kyrtong ka NPP na Mawryngkneng, u Bah Pyniaid S Syiem u la pynpaw ka jingsngewnguh ia ka UDP kaba la pynbna ban kyrshan ia u ha ka election na Mawryngkneng da kaba khlem sei satia ia u kyrtong.
U la ong ba baroh ki nongkyrshah ki trei shitom na ka bynta ban ioh ia ka jingjop bad ka jingjop kan dei na ka bynta ki paidbah ba kin ioh ia ka jingkylla hapoh ka constituency, bad kum u nongmihkmat un shim khia ruh ban trei borbah na ka bynta ban rat diengkhong ia ki kam sniew khamtam u drok, bad ka jingkyrduh kam ki samla kan dei kawei na ki mat ba hakhmat ba u iasaid.
Haba kylli u la ong ba ha ka election ka don beit ka jingiakhun bad ym dei ban kheinsting bad pynpaw ka jingkyrmen ban ioh ia ka jingjop, da kaba u la ong ba ka jingnsgewlem kan nym treikam ha ka por ba jeid ia u nongmihkhmat.
