SHILLONG, NAILUR 30: Hadien ka jingkhlad noh jong u MLA ka Mawphlang, u Bah Syntar Klas Sunn ha ka 10 tarik mynta u bnai, mynta ka sngi 30 tarik na ka liang kiba ha ïing ha sem ki la pynbna ban phah mih bujli da u khun shynrang, u Eugeneson Lyngdoh.
Ïa kane ka rai jong ka ïing u MLA barim la shim hadien ka jingkwah ki paidbah jong katei ka constituency, ia kaba la pynbna paidbah mynta ka sngi ha ïingsah u Bah SK Sunn kaba don ha Mawngap. Kane ka jingshim rai jong kiba ha ïing ka long hadien ba ka Election Commission of India ka la pynbna ia ka tarik ban pynlong ia ka election shiteng samoi ha ki lai tylli ki constituency ka ban long ha ka 30 tarik u Risaw 2021.
