Ka United Democratic Party ka la kyntait ban don ka jingiateh lok bad kiwei pat ki seng sainpyrthei na ka bynta ka election shiteng samoi ha ki lai tylli ki constituency ka ban sa long ha ka 30 tarik Risaw, laitnoh Mawphlang ba la rai ban pyniakhun da ka jingkyrshan ka Hill State Peoples Democratic Party (HSPDP) kaba don hapoh ka Regional Democratic Alliance bad ka UDP.
Haba kren bad ki lad pathai khubor, u President ka UDP, u Bah Metbah Lyngdoh u la ong ba ka party ka khlem iateh lok lypa na ka bynta ka election shiteng samoi, laitnoh ha Mawphlang ba ka HSPDP kam pyniakhun kyrtong satia. Katba ha Mawryngkneng ka UDP kan sa shim rai la kumno kumno lashai ka sngi, bad na ka bynta ka Rajabala u la ong kam pat don ka jingiakren bad ka NPP ban iatreilang, ha kaba u la iathuh ruh ba ki don ki kyrtong kiba la pynpaw ba ki kwah ban iakhun ia ka election na ka UDP ha Rajabala.
Haba kylli, u Bah Metbah u la ong ba ia mynta kam pat don satia ka jingiakren ban don da u kyrtong monlang jong ka Sorkar synrop MDA ha ka election shiteng samoi. U la pynpaw ia ka jingkyrmen ba ka UDP ka don ia ka jingkyrmen ban jop ia ka Mawphlang.
Na ka liang u General Secretary ka HSPDP, u Bah Renikton L Tongkhar u la pynpaw ba ka party ka hun ban ai ka jingkyrshan ia u Bah Eugene ha Mawphlang, bad wat ha Mawryngkneng ruh ka RDA kan iatreilang.
