SHILLONG, Nailur 29: U Myntri Rangbah ka Jylla, u Conrad K Sangma u la ong ba ha ki khyndiat taiew ban wan un sa lum ia ka Kynhun Myntri ban bishar ia ka kaiphot ba la aiti da ka High Level Committee halor ka them metor ne ka sweeper’s lane kaba don ha Them Ïewmawlong.
Ka High Level Committee ban pynkynriah ia ki briew kiba sah ha Them metor ne sweeper lane hynnin ka sngi Ba-ar ka la aiti ia ka kaiphot ba pura sha ka Sorkar Jylla, bad hadien ba ka HLC ka la dep ban aiti ia kane ka kaiphot ka Sorkar kan sa shim ia ka rai hapoh ka Kynhun Myntri.
U Myntri Rangbah u la ong ba hashwa ban rah ia ia katei ka kaiphot hapoh ka Kynhun Myntri na ka liang ka Political Department kan pule bniah bha ia katei ka kaiphot, hadien kata yn sa bthah ia ka HLC ban wanrah i aka hapoh ka jingialang jong ka kynhun Myntri, bad hadien ba la dep ban bishar hapoh ka Kynhun Myntri (cabinet) ka Sorkar kan sa shim ia ka rai kumno ban iaid shakhmat.
Ha kajuh ka por u Myntri Rangbah u la ai khublei ia ia ka HLC hapoh ka jingialam u Symbud Myntri Rangbah, u Bah Prestone Tynsong bad ia ki dkhot kiba la treishitom bad lah ban pynbiang ia katei ka kaiphot.
Lah ban kdew ba ka jingiakhih ia ka them metor ka la khie biang naduh ka 31 tarik Jymmang 2018 kaba la ktah ruh ia ka suk ka sain ha baroh kawei ka Jylla, bad hadien kane na ka liang ka Sorkar ka la thaw ia ka High Level Committee ban wad ia ki lad na ka bynta ban weng ia ka jingeh na katei ka jaka, khamtam hadien ba la mih ka jingdawa ba dei ban pynkynriah noh ia ki briew kiba sah ha katei ka jaka.
