Ha kine ki ar taȉew kiba la leit noh, ka seng ki nongdie madan, ka Meghalaya and Greater Shillong Progressive Hawkers and Street Vendors Association (MGSPHSVA) ka la phah haduh kumba saw (4) tylli ki jingthoh dorkhast kiba bniah, ryngkat bad ki jingpynshisha, sha u Special Officer jong ka Meghalaya High Court, u Chairperson ka PTVC bad Deputy Commissioner East Khasi Hills. Ha kine ki dorkhast la kdew shai ia ka jingleh be-aiǹ bad ka jingpynkheiǹ ia ki kyndon jong ka Aiǹ, (The Street Vendors Protection of Livelihood and Regulation of Street Vending Act 2014), da ka Shillong Municipal Board ha ka por ba ka pynkynriah jubor ia ki nongdie madan ha Khyndai Lad ha ka 23 July 2025.
Ȋa ka jingpynkynriah ia ki nongdie madan ha Khyndai Lad la rai bad leh tang da ka ophis jong ka Shillong Municipal Board marwei, khlem ka rai ne ka jingȉakynjoh ktien lang ha ka Provisional Town Vending Committee lymne bad ki nongdie madan. Kumta kane ka jingleh jong ka Shillong Municipal marwei kam long kaba shongnia, shongaiǹ, kam long kaba beit bad ka bym shong hok. Ha kane ka jingleh donbor bad jingleh be-aiǹ jong ka Shillong Municipal Board, la don shibun ngut ki nongdie madan kiba shisha bad kiba la dep ban shah ia ka in situ survey ne ka jingjurip, kiba khlem ȉoh ia ki Certificate of Vending (CoV) bad ki la duh ei ia ka kamai jakpoh. Kane ka la ktah jur ia ka jingim jong ki bad kine mynta ki don hapdeng ka jinglynga bad jingdukha mynsiem kaba shyrkhei. Kumta ka seng ki nongdie madan ka buh ki jingkylli bad jingartatien halor ka jingleh jong ka Shillong Municipal Board bad ka dawa jur ba dei ban tohkit bad pynbeit mardor ia kane ka kam. Ka Shillong Municipal Board ka dei ruh ban buria ia ka jingduh kamai jakpoh jong kine ki nongdie madan kiba la duh ka kamai kajih.
Haduh mynta kam pat shym don ka jingpynbeit ne ka jingpyrshang ban pynbeit ia kine ki kynrum kynram bad ba ka Provisional Town Vending Committee ruh kam pat shym la lum ia ka jingȉalang. Namarkata ka daw, ki nongdie madan kim don shuh da kawei pat ka lynti lait sa tang ban pynlong da ki jingȉakhih hakhmat ka ophis jong ka Shillong Municpal Board ha ka 1 August 2025.
Na ka liang ka Seng ki nongdie madan (MGSPHSVA), ka pynpaw hangne ia ki kynrum kynram kiba bun. Kane ka jingpynpaw kam dei kaba shu thaw nang hynrei ka dei halor ki kot ki sla bad ki sakhi kiba khlaiǹ. Kine harum ki long ki kynrum kynram kiba ka seng ka dawa ban pynbeit mardor.
Haduh mynta ka Shillong Municipal Board kam pat lah ban pynmih paidbah ia ka thup kyrteng jong ki nongdie madan kiba la dep shah survey bad kiba la dep ban pynshisha, kumba la hukum da ka High Court.
Ka Shillong Municipal Board kam pat lah ban sei ne pynbna paidbah ia ka thup kyrteng jong ki nongdie madan kiba la shah survey bad kiba la dep pynshisha kumba la hukum da ka High Court.
.Ka thup kyrteng ba la pynmih da ka Shillong Municipal Board, ka dap da ki jingbakla suda ha kaba ki nongdie madan kiba shisha bad kiba la dep ban shah survey ki khlem mih kyrteng, katba kiwei pat ki bym dei ki nongdie madan ki ȉoh ia ka CoV.
Ka Jingpynkynriah kaba long Be-Aiǹ
Ȋa ka notis ban pynkynriah ia ki nongdie madan ha Khyndai Lad, la phah ha ka step phyrngab jong ka 23 July 2025 (wat u syiar ruh um pat khie thiah) lyngba ka WhatsApp bad ki nongdie madan kim shym la ȉoh por ban pynkhreh na ka bynta kata ka kam pynkynriah jaka shong die jingidie.
Ka jingpynkynriah ka la ȉaid shakhmat khlem ka jingpynkhreh ne ka jingpynbit pynbiang ia ka thup kyrteng. Kumta kane ka long be-aiǹ bad ka dei ka kam beiǹ hukum.
Ka Jaka ba la pynkynriah ia ki nongdie madan ha Khyndai Lad ka long ka bym bit bym biang bad ka bym shngaiǹ
Haduh mynta ka jaka ha Parking Lot MUDA ha kaba la pynkynriah ia ki nongdie madan ka long ka bym bit bym biang bad ka bym shngaiǹ. Ha ka sngi ba la pynkynriah bad ki sngi kiba bud, ka jingpyntrei ia katei ka jaka ka dang ȉaid shakhmat bad ka la long ka jingeh bad jingiwit ia ki nongtrei bad ruh ia ki nongdie madan. Haduh mynta kane ka jaka kam don ki paiǹkhana, ka um bam umdih, ka jaka bret ia ki jakhlia, ka bording kaba shngaiǹ bad kumjuh ka kudam buh tiar.
Ki jaka shong die jingdie kim long kiba bit bad la shna torti ia ki khlem ka jingȉakynjoh ktien bad jingȉarai lang ha PTVC.
Ka jaka shong die jingdie hapoh MUDA Parking Lot ka long ka jaka kaba shlei um ha ka por slap bad kane ka ktah jur ia ka die ka thied bad ka koit ka khiah jong ki nongdie madan.
4. La pynkynriah jubor khlem ki kyndon ne jingpynbiet kiba thikna.
Ha ka jingshisha na ka liang ka MGSPHVA ka la pynkhreh ban tyrwa bad buh ia ki kyndon ne ka rukom pynbeit kumno ban pynkynriah ia ki nongdie madan ha Khyndai Lad khnang ba kan long kaba ȉaid beit bad khamtam eh ba kan ym ktah ia ka kamai jakpoh jong ki nongdie madan.
Kaba pynmih jingkulmar eh ka dei ka jingpynkhalai nusib na ka bynta ki jaka shong kaba khlem pat ȉakren ne rai ha ka PTVC. Kane ka pynpaw ba ka rukom treikam jong ka Shillong Municipal Board ka long kaba thurmur bad la shu leh tang dep bad kam don ruh kano kano ka rukom ai jingkheǹ bad ba kumno yn weng ia ki jingeh kiba ki nongdie madan ki shem ne duh ia ki CoV.
5. Ka jingpynduh License ia ki nongdie madan kiba shisha:
Kumba 106 ngut ki nongdie madan kiba shisha kiba la dep shah survey hynrei kiba khlem ȉoh ia ki License. Mynta kine ki nongdie madan ki la duh ki jaka shong die jingdie bad ki la duh ka kamai jakpoh.
Ki nongdie jingbam ia kiba la pynbeit ba kin die ia ki jingbam ha ka lynti ha khmat ka MUDA Complex, mynta pat la thynǹian bad thep jubor ia ki shapoh MUDA Parking Lot. Kane ka jaka kaba ki die mynta ka long ka bym biang bad ka bym koit bym khiah.
Ki Jingdawa:
Ka Seng ki nongdie madan (MGSPHSVA) ka buh ia kine ki jingdawa bad ka kyntur jur ia ka Shillong Municipal Board bad ka tnat Urban jong ka Sorkar Jylla ban shim khia bad pynbeit mardor ia kine ki kynrum kynram bad weng ia ki jingeh baroh:
Ba ka Provisional Town Vending Committee ka dei ban lum kyrkieh ia ka jingȉalang jong ka khnang ban ȉakren bad ȉatai halor ka jingpynkynriah jubor bad jingleh be-aiǹ jong ka Shillong Municipal Board bad ban pyrkhat kumno ban leh nangne shakhmat khnang ban lait na ki jingeh. Ka Provisional Town Vending Committee ka khlem shong jingȉalang shuh naduh ka 23 June 2025. Mynta la pynbeit ba ka PTVC kan long ha ka 6 August 2025, hadien ba ki nongdie madan ki la leit tur sha ophis jong ka Municipal bad dawa ban pynlong ia ka PTVC.
Ban pynwandur thymmai ia ka bynta jong ka Khyndai Lad naduh na Khyndai Lad haduh Lynti Umsohsun kumba la ȉakren bad rai ha ka PTVC mynshuwa.
Ban pynwandur thymmai bad shna biang ia ki jaka shong jong ki nongdie jingdie kiba la kynriah mynta ha MUDA Parking Lot.
Ban sam noh ia ki CoV sha baroh ki nongdie madan kiba shisha bad kiba la dep shah survey. Ha kajuh ka por ba leh biang mar mar ia ka survey halor kito kiba la shah ȉehnoh bad kiba khlem ȉoh license.
Ban thaw mardor ia ki kyndon na ka bynta ki jingpynbeit ia ki nongdie madan bad ruh ban thaw ia ka kynhun ne ka tnat ka ban peit ia ki jingujor bad ki jingeh ba ki nongdie madan ki ȉashem ha ka por ba pynkynriah jaka ne ha ka por ba pynbeit ia ka rukom shong die jingdie jong ki. Nalor nangta, baroh ki thup jingtip kiba ȉadei bad ki nongdie madan dei ban pynmih bad sam paidbah.
Dei ban ȉathuh bad pynmih paidbah halor ki jinglut jingsep, kaba kynthup ia ki contractor kiba ȉoh ban pyntrei ia ka kam shna ia ki jaka shong die jingdie ha MUDA Parking Lot.
Dei ban thaw ruh ki kyndon ban pyrkhing bad khanglad ia ka jingdie pateng ia ki license bad ia ki jaka shong die jingdie.
Ka jingpynkynriah jubor ia ki nongdie madan, ym dei tang ba ka pynkheiǹ ia ka aiǹ ne ka beiǹ ia ka hukum jong ka High Court, pynban ka shat phalang ia ka jingthurmur ne jingmutlop jong ka treikam treijam ha ki tnat sorkar, kum ka Shillong Municipal Board. Ym tang katta, ka dei ruh ka jingleh thombor bad ka jingkynjat ia ka pliang ja jong ki rangli ki juki. Kumta ka MGSPHSVA ka pynrem jur bad ka kyntait ia kane ka jingleh be-aiǹ jong ka Shillong Municipal Board kaba la ktah jur ia ka ȉap ka im jong ki spah tylli ki longȉing. Mano ban bah khlieh ia ki jingeh kiba kine ki nongdie madan, khamtam kito kiba dei hok bad kiba duh ia ki CoV? Mynta kine ki nongdie madan ki duh thiah duh dem, ki lynga ki pisa jingmut bad lehse ki lah ruh ban ȉoh ia ki jingpang kiba lah ban ktah ia ka bor pyrkhat jong ki.
Ngi pynkynmaw ruh hangne ba kawei ka bynta ba kongsan ba ki nongdie madan ki dei hok ban ioh katkum ka Ain, ka long ban ujor iano iano ba ki tip shai ba kim dei hok ban ioh CoV bad ban kam kynti ia la ka jong ka hok (claims and objections).Ha kaba iadei bad ki nongdie madan kiba shong die jingdie naduh Khyndai Lad haduh Lad Umsohsun ki la ioh ban leh kumta hapoh ka jingkhmih jong ka PTVC.
Kaba sngewkhia pat ka long ban tip ba ki nongtrei ka ophis Shillong Municipal Board lyngba ka telephone ki khot bad wer ia kiwei pat ki nongdie madan kiba shong die jingdie ha kiwei pat ki bynta jong ka Nongbah Shillong ban kin wan shim ia ki CoV. Kane ka dei ka jingleh be- ain namar ha kiwei ki jaka jong ka Nongbah Shillong ym pat shym la pyndep ia kane ka bynta ba ki nongdie madan kin kam kynti bad ban ujor( claims and objections) . Kumta ka MGSPHSVA ka kyntu jur bad dawa ban sangeh shi syndon ia kane ka kam be- ain.
Ka Seng MGSPHSVA ka ban jur bad dawa ba dei ban pynbeit mardor ia ki kynrum kynram bad weng ia ki jingeh. Shuh shuh ba nangne shakhmat dei ban kynjoh ktien bad ȉarai lang bad ki nongdie madan ha shuwa ban shim ia kino kino ki sienjam. Lym kumta ka Seng kan ym shong thait ban dawa ia ka hok.
Shane Thabah
General Secretary
MGSPHSVA
