Ki nongialam jong ki seng sain pyrthei kiba kynthup ia ka Voice of the People Party (VPP), ka National People’s Party (NPP) kila wan ban ai jingkyrshan ia ka jingiakhih ka KSU Sawsymper, Border Area bad Lawbah area ban dawa pynurlong noh ia ka Civil Sub-Division na bynta ka Mawsynram Community and Rural Development Block.
Ia kane ka jingiakhih la pyllong ka KSU ha Madan Malki mynta ka sngi.
Ki nongialam ka NPP kynthup u MLA barim bah Himalaya Muktan Shangpliang, u MDC bah Alvinstone Sawkmie, kila wan ban ai jingkren katba na ka VPP la wan u bah Rusievan Shangpliang.
Na ka liang, kine ki nongialam kila pynpaw ba ka Mawsynram Block kala biang bad kala dei hok ban kiew kyrdan noh sha ka Civil Sub-Division.
U bah Alvinstone ula ong ba kaba donkam ka dei ka mon sain pyrthei namar ba ka South West Khasi Hills, ka Eastern West Khasi Hills kiba don tang 2 tylli ki konstitwensi kila ioh ia ka district, kan eh aiu ia ka Mawsynram ban kyntiew sha ka Civil Sub-Division.
U bah Rusievan ula ong ba ki paidbah ki dei ban kyrshan ban pynbor ia ka sorkar ba kan ai noh ia ka Mawsynram Civil Sub-Division.
Katba u bah Himalaya ula ong ba kane ka kam ka dang don ha ka jingbishar ka sorkar kaba peit da kawei ka Committee kaba khlieh da u Chief Secretary ka jylla.
La ioh ruh ia ka jingkren na u President ka KSU South West Khasi bah Forward Nongrem.
