Ka Thma U Rangli Juki ka pynrem jur halor ka jingshah shoh jong ki ar ngut ki samla pule kiba na ka skul bah Central University Kerela kaba la jia ha ki thaiῆ Lad Robert Hospital ha Jaїaw, Shillong ha ka 24 Jylliew 2022 bad kiwei dei kiba la jia ha kine ki khyndiat bnai ba la lah.
Kane ka jingshah shoh khlem daw bad khlem nongrim jong ki briew kiba lui lui kiba na shabar ka jylla bad kiba napoh ka Jylla bad ki bym dei ki khasi, kum ki nongbylla sngi, ki nongdie dawai sha ki Hospital, ki nongbylla kiba pynpoi tiar bad pynpoi jingbam sha їing ki briew, ha ki katto katne ki shnong jong ka Nongbah Shillong ka jur bha ha kine ki sngi.
Kiba bun na kine ki jingjia ki paidbah kim tip namar ym don ba nud їapur khana bad wat ka tnat pulit ruh ka shu sngap jar jar bad kam shym kitkhia ban buddien, ban tohkit, ban kem bad pynshitom ia ki riew runar kiba donkti ha kum kine ki kam pyntriem briew bad kiba pynbud nam ia ki shnong ki thaw, ia ka imlang sahlang bad ia ka Jylla.
Ka dei ka jingbakla bad jingsngewthuh bakla kaba khraw tam lada ngi pynksan ia kine ki jingshoh jingdat bad jingpynmynsaw briew ba ka dei ka jingpyneh rngiew ne jingїada ia ka Ri bad Jaitbynriew.
Ka TUR ka pynkynmaw bad їai ban kumne; hoid ngi dei ka Jaitbynriew kaba rit paid bad kum ka Jaitbynriew bad ka Jylla kaba rit paid ngi don shibun ki jingeh kiba ngi dei ban їakhun pyrshah, naduh ka jingkyrduh kam ki samla, ka jinghiar ne jingduna ka rep ka riang, ka khaїi pateng, ka їoh ka kot, ka jingjot ki khlaw, ki um ki wah haduh ki jingpang bad jingduna ha ka sumar pang bad kumta ter ter. Hoid, ka don ruh ka jingsheptieng ba ka Jylla bad ki Jaitbynriew ritpaid (Hynῆiewtrep bad Ackik) jong ka Jylla ki lah ban shah tyllep, ba їoh duh ka kheiῆ kur kheiῆ kha, ka ktien bad ka khyndew. Hynrei kine ki jingeh ne jingma kim lah pat ban pynksan nia ne mutdur ba man la uwei pa uwei ne kawei pa kawei kiba na bar Jylla bad kiba napoh ka Jylla ki bym dei ki khasi, kiba wan їuh kjat ha ki shnong ki thaw ki dei kiba wan hiar thma ia ngi bad ba ngin shu bom shu tied kat haba lap ha lynti syngkien ia kiba lui lui. Hynrei ki don ki aiῆ kiba ma ngi hi ngi lah thaw lyngba ki nongmihkhmat ha ka їing dorbar thaw aiῆ kum ka Benami act, ka Land transfer act bad ka Sixth Schedule kiba lah ban pynbeit ia ka rung ka mih bad ban їada ia ngi.
Bunsien pat ngi matlah bad ngim їohi ia ki jingma kiba shisha bad ia ki heh saipan (capitalist) khwan myntoi shimet kiba na bar bad napoh ka Jylla kiba klun tylli ia ka spah, ka nongtymmen (mariang bad khyndew) jong ngi kaba kynthup ruh ia ka ktien bad kolshor jong ka Jaidbynriew. Ym tang katta ha kine ki phew snem kiba la leit noh ki nongsynshar kim shym pyntreikam hok ia kine ki aiῆ bad lad jingїada, pynban ki їaleh ban pyntlot bor ia kine ki aiῆ na ka bynta ka jingkhwan myntoi shimet jong ki bad na ka bynta ki heh saipan kiba ki їaieid їathoiῆ bad kiba bei tyngka na ka bynta jong ki ha ki por elekshon.
Ka TUR sa sien ka pynrem jur bad ka kyrpad ia ki Dorbar Shnong ban shim khia halor kine ki jingjia bad khamtam eh ia ki bor bad tnat pulit ban ym thiah thai lyngngai bad lada ka tnat pulit kam lah ban tehlakam ia kine ki jingjia ka don ka jingma kaba shyrkhei ia ka imlang sahlang.
Ka Jaidbyriew bad ka imlang sah lang baroh kawei ka dei ban shim khia bad ngi dei ban wad ki lad ki lynti ban wanrah ia ka jingshnong shngaiῆ bad ruh ha kajuh ka por ngi dei ban їakhun na ka bynta ka їohkam їohjam jong ki samla bad kiwei ki jingeh kum ka jingduk, jingkyrduh bad jinglah shilliang ha ka їoh ka kot bad kumta ter ter.
