SHILLONG, Nailur 28: Hadien ba ka Election Commission of India ka la pynbna ia ka tarik ban pynlong ia ka election shiteng samoi ha ki lai tylli ki constituency hapoh ka Jylla, ka jingpynkhreh ia ka election ruh ka la sdang shongshit ha kaba ki seng sainpyrthei ki la sdang ban pynbna ia ki kyrtong ban ia airing.
Na ka liang ka National People’s Party kaba ialam i aka Sorkar synrop Meghalaya Democratic Alliance ka la pynbna ba kan pynbakhun kyrtong ha baroh 3 tylli ki constituency, bad mynta ka janmiet ka la pynbna syndon ia ka kyrteng jong ki kyrtong, kata na Mawryngkneng da u Bah Pyniaid Sing Syiem bad na Rajabala da u Abdul Saleh, kataba na Mawphlang ka NPP kan dang bishar ia u kyrtong ha kine ki khyndiat sngi ban wan.
