Kane ka juk mynta ka la kylla long biang kum ka juk jong ka Thma kumba ka ju long ha ki por hyndai.Ka Thma hapdeng ka Russia bad ka Ukrain kam pat kut satia.Ka Thma jong ka Israel bad ki Hamas bad nangta sa ka thma hapdeng ka US bad ka Iran ka dang jur bha haduh mynta.Hynrei ka Thma kaba i shyrkhei eh ka dei ka Thma poh iing(internal war) hapoh ri India hapdeng ki kynhun liang pyrshah(INDIA BLICK) bad ka kynhun sorkar NDA hapoh ka jingialam jong ka party BJP halor ka jingleh buit tuh ban shu pynjop elekshon suk da kaba shu leh donbor(boldose) bad leh thok lyngba u Ganesh Kumar,u Chief Election Commissioner jong ka sorkar India. Hynrei ka Thma kaba kham itynnad eh ka dei hangne pynban hapoh jylla Meghalaya jongngi hapdeng ka sorkar jylla(MDA-2) hapoh ka jingialam ka party NPP pyrshah ia kawei pat ka party liang pyrshah kaba bat ia u Lakam synshar ha KHADC hapoh ka jingialam ka party VPP.Kane ka Thma ka dei halor ka jingshna ia ka project Ropeway na Lum Shillong shaduh Riat Laban ter ter.Ka jingmih ki kynhun pyrshah Ropeway ha kine ki bnai ba la dep ka la pynktha khlieh ia ka sorkar jylla kaba la dep pynbit pynbiang lut baroh nadong shadong ban pyniaid shakhmat ia katei ka project.Hynrei,kaba kham I bang shuh shuh kalong ka jingpynktha khlieh jongki sa ia ki nongialam shnong jong ka Riat Laban,Raid Laban,etc. kat haduh ba, imat,lada bakla tiak,ki hap wat ban pynphai noh ia ka pisa kaba lai(3) klur tyngka ba ki la dep shim na ka sorkar jylla lyngba ka Tourism Dept.ban ai wai ia katei ka jaka jong u lum Shyllong. Ha kine ki taiew ba la dep,kane ka kam(issue) bad ka project Ropeway ka la kylla long noh ka Thma politik(political war) hapdeng ka KHADC hapoh ka jingialam jong ka party VPP kaba la leit khang tala jubor noh ia ka iing treikam jong ka company,ka company kaba la mut ban pyntrei ia katei ka project.Lyngba katei ka hukum jong ka sorkar jylla ban phah leit plie noh ia ki tala ba la khang daki briew jong ka KHADC lym kumta ka sorkar jylla lyngba ka Tourism Dept kan sa leh da kaba tyngeh,katei ka kam(issue) ka la kylla long noh mynta ka Thma bah(political war) hapdeng ka sorkar jylla(MDA-2) pyrshah ia ka KHADC hapoh ka jingialam jong ka party VPP. Hadien ka jingiehnoh kam(resignation) jong u President jong ka party UDP na ka kam myntri sorkar(cabinet minister),tang shi sngi ar sngi hadien kane,u Chief Minister ka Meghalaya,u Conrad K.Sangma khlem da pynslem shuh u la phah pynsmai noh hi wut wut ia u Bah Paul Lyngdoh ban aiti biang ia u ia ka kam Tourism ba un ioh iakhun noh wut wut bad ka VPP ia kane ka issue Ropeway project ha lum Shyllong namar dei ha ka por ba long Tourism Minister u Bah Paul ba la sdang ia katei ka project.Ban iakhun ia ka party kaba ehrang bad ka bym ju sngap ne pyndem iano iano ruh,dei sa tang u Bah Paul u riew iakhun bad u riew ialeh uban long uba satar pyrshah ia ka KHADC.Dei hangne kein ba ka jingiakhun ruh kan long shisha kaba itynnad bha.Ki paidbah kin ia peit kai shwa, mano ban jop, jop ka KHADC ne jop ka sorkar jylla (MDA-2) hapoh ka jingialam ka party NPP ha kane ka Thma politik(political war) kaba lah ban poi shaduh Supreme Court ruh kumba ka la jia ia ka Thma hapdeng ka KHADC bad u Syiem Mylliem ha kine ki bnai ba la dep.
Ka Thma hapdeng ka sorkar Jylla (MDA-2) bad ka Khasi Hills Autonomous District Council(KHADC). Babu Kular Khongjirem.
