Shillong, Risaw 15: U nongialam ka BJP ha Meghalaya uba dei ruh u MLA ka Pynthorumkhrah, u Bah Alexander Laloo Hek u la ong ba ka dei ka mon jong ki paidbah ban jied ia kano kano ka party ha ka por election, ka jingong jong u Bah Hek ka long halor ka jingmaham ka seng kiengatiar Hynniewtrep National Liberation Council (HNLC) ba kim dei ban vote ia ka NPP ha ka election shiteng samoi ka ban sa long ha ka 30 tarik mynta u bnai.
U Bah AL Hek uba dei ruh u Myntri barim ha ka Sorkar MDA uba la shim khia bha ban wanrah ia ka HNLC sha ka jingiakren iasuk, u la ong ba mynta ruh u kwah ban don ka jingiakren bad u kloi ban long u ksiang lane u nongialam sha ka jingiasuk ia ki dkhot ka HNLC bad ki nongialam ha Delhi.
Haba kylli, u la ong ba kum u nongialam u kwah ba baroh kin don ha ka jingshong suk shong shngain, bad kumjuh ia ki dkhot ka HNLC ba kin wanphai noh sha ka lynti kaba beit.
U Bah Hek uba la shah thung ruh u dkhot ha ka national executive committee jong ka BJP, u la ong ba kane ka jingshah thung dkhot kan long ka jaka ba biang eh ban iakren ruh ia ki mat ka Jylla ha Delhi.
U nongialam ka BJP u la ong ruh ba kum uwei na ki nongshong shnong ka Jylla, u kwah ba ka Meghalaya kan long ka Jylla kaba lait na ki kam kaikhlaw, kaba lait na ka jingsngew iapher jaidbynriew.
