Shillong: ka long ka khubor ba sngewtynnad ban tip ba na ka liang ki samla Rangbah ba dei artad ki nongseng nongdang ia ka pung jngi ha ka nongbah ka True North Leisure Centre ryngkat ki kmie ki kpa jong ki khynnah, ba ka pynurlong ia kawei na ki thong ba la tharang bad ba la angnnud bad katta ka long ka jingkhreh ban leit iashim bynta jong ki khynnah sha ka lympung iakop jngi ban sa long ha sorbah bengaluru mynta u bnai.
Kumban shu pynkynmaw hangne ba na ka liang ka Meghalaya Swimming Association, ka la dep shwa ba kan pynlong ia ka jingpyrshang ne ka trials ba la pynlong ha pung jngi Crinoline, hadien ba la dep ban pynlong ia kane ka jingpyrshang, la lah ban jied ia ki khynnah ba dang rit ba ha ka sien kaba nyngkong, kin ioh ia ka lad ba kin leit ban iashim bynta sha ka jingiakob ba la tip ia ka kum ka Glenmark 37th Sub Junior National bad 47th Junior bad bynrap lang da ka jingkhreh ban iashim bynta ha ka 74th National Aquatic Championship 2021.
Ka jingjied ia ki khynnah ka la long ha ka 18 bad ka 19 tarik jong u bnai nailur ba dang shu dep.
Hadien ba la dep ban jied ia ki khynnah,l ka MSA ka ka la shim khia ba kan da wanrah ia u coach ba dei napoh ka Assam Rifles, bad hadien kane, ia ki khynnah baroh, na ka liang ki samla Rangbah nongpyniaid jong ka True North Leisure Centre, ki la shah bad ailad ia ki khynnah ba kin ia kilan ne ban ia jngi ha kane ka jaka.
Ka jingailad jong ki samla nongpyniaid ka True North leisure Centre, ka long namar ba ha pung jngi Crinoline, ka um ka la pjah bad ka suinbneng ruh ka khriat bha, kaba da kylla ka ktah ia ka jingia kilan jong ki khynnah.
