Shillong 28 tarik Nailur 2021:
Ka Mawryngkneng Tourism Promotion Society (MTPS), ka la kynmaw ia ka sngi kypang jong ka kam jngohkai pyrthei kaba la tip kum ka “World Tourism day” bad ia ka mat phang pdeng kaba la buh “Tourism for Inclusive Growth & Sustainable Development” ia kaba la pynlong ha Orchid Seven Huts Restaurant, Mawryngkneng. Ia ka sngi ki kam jngohkai ba la long u The President ka MTPS bah Wanlambok Kharsati, u la pyniaid ia jingialang ha ka jingiadon ki Rangbah Shnong , ki Seng Bhalang bad ki kynhun Seng Samla jong katei ka thain Mawryngkneng baroh kawei.
Ha katei ka jingialang u Dr. Evarist Myrsing, Project Facilitator ka Not On Map, Meghalaya u long u nongai jingkren ban pynsngewthuh halor ka jingkordor jong ka kam jngohkai pyrthei namar ka long kam ba kamai jakpoh bad ka kam pynroi ia ka imlangh ka sahlang ha ka shnong ka thaw.
Kiba la ai jijngkren ki kynthup ia u Bah K. Khyllait, kum nongshah khot sngewbha u Bah Peter J. Lawai u Sordar ka Mawryngkneng, katba u BDO ka Mawryngkneng C & RD Block, Bah Ronney Wahlang, MCS u la long u kongsan ban plie ia kane ka jingialang bad ka jingpyllait paidbah ia ka dur khih jong ka Mawryngkneng Tourism Tourism Promotion Society .( MTPS)
U Ronney Wahlang, haba ai jingkren u la pynsngew ia ka lad ban pyni ia ka jingriewspah jong ka kam jngohkai pyrthei kaba don ha Mawryngkneng ka long kaba khring ia ki paidbah.
Shuh shuh haba pynsngew ia ki kam ryngkat ka jingtrei shitom ban kyntiew ia ka kam jngohkai pyrthei jong ka MTPS ban kyntiew ha ki thain Mawryngkneng ka la dei ban don ha ka map jngohkai jong ka jylla namar ka jingitynnad jong ka Mei Mariang.
U Bah BDO u la kyrmen ba lyngba ka Video ba ki paidbah bad ka pyrthei kin tip bad iohi ia ka jingpawnam ki pyntha rep jong ka Sung Valley ka jingdon jong ka Thwei Lyngksiar’ kaba don ha Kseh Pyndeng bad ka ‘ Kshaid Thwei Thir’ kaba don ha Thangshalai.
Shuh shuh ka kshaid ‘Shangkram ’ kaba don ha shnong Kut ka Kshaid ‘Parmaw” bad ka Kshaid ‘Lwang’ kaba don ha Mawryngkneng kaba long kaba khring bha ia ki nongwan jngohkai pyrthei.
Kaba khadduh kaba u BDO ka Mawryngkneng ba u pynsngew ka long ba ki paidbah ki dei ban sumar bad ka block ka kloi ban syniang ia ki kam pynroi kum ki lynti ki synkien kiba ban pynioh lyngba ki MNREGS.
