Hato! ka Pyrthei ka la Jan wai seh? Babu Kular Khongjirem.

Ki dak ki shin ba u khun bynriew u la leh khyllah ha kane ka pyrthei ka pyni ba ym slem shuh ba kane ka pyrthei ka la jan wai.Haba ong ba ka pyrthei ka la jan wai,kam mut ba kut ne jah noh ka pyrthei hynrei ka jingpynjot u khun bynriew ia ka da ki jingleh jingtrei ki bym man(ba sniewdur palat), ki jingpynjaboh bad pynjakhlia kulmar ba laiphew jait,ka jingkhlong u khun bynriew ia baroh ki dohnud- dohtor, naduh ka snier ka snap jong kane ka mariang, u la khoh snep lut baroh ia ka khlem salia ne isynei shuh khamtam eh ki jingleh ia ki kam sniew ba Lai phew jait ba u khun bynriew u la leh kamkai tang ban ioh kamai spah na ka, ka jingsniew jinglong ha ka rukom im u briew ha kylleng satlak kane ka pyrthei ka la ima shibun ia kane ka pyrthei shong basa jongngi mynta. Na ka history hyndai naduh ka por u Noah, U Blei u la bitar ia ki jait kam sniew kam bym man ba laiphew jait ba ki briew ki la leh(committed a sin) ha kito ki por.U la ai jingsneng da ka jingshlei um sawphew miet sawphew sngi haduh ba la iap lut ki ‘riew bym man(wicked people) baroh lait noh sa tang u Noah bad ka ing ka sem jongu.Ha ri Khasi-Jaintia jongngi ruh hyndai,u Blei u la tap lup da ka Diengiei haduh ba u khun bynriew u la hap ban pan map na U Blei lyngba ka jingiarap ka sim Phreit. Kumjuh ruh, ka Sngi(Ka Hok) ka la phet rieh noh sha Krem ‘Lamet- krem ‘Latang haduh ban da leit khot da u Men Lyngkhoit Men Lymnoit(U Syiar) uba dei u ‘Riew Hok u ‘Riew Blei ba ka Sngi(Syiem ka Hok) ka la kohnguh ban wanphai biang ban pynshai bad pynphuh pynphieng(enlighten) ia kane ka pyrthei haduh mynta mynne. Ha kane ka juk mynta pat,imat u khun bynriew u la sdang ban leh pop leh sang biang mynta..Imat, u Blei u lah ban pynjot bad pynshitom biang ia u khun bynriew ha ki rukom ba kham pher,namar, kumba ong ki ‘riewstad ba, ka history ka ju wan jia biang bad tyllun biang sha juh(history repeats itself). Sngap na ka jingiathuh lypa u Khasi hyndai ia ka jinglong jingim tang jongngi ki para Khasi-Jaintia ruh la sngew ma lypa .”Lada ia tylli u Khasi,kata,ka pyrthei ka la jan wai”.Ym tang katta,mynta bun sa ki kynthei kiba tuklar ia ki kam ki jam jong ki rangbah Khasi.”Haba la kynih ka ‘Yiar(syiar) kynthei,kata,ka pyrthei ka la jan wai”. Sa ka jingleh stad u briew ruh ka la long shaba palat liam.Wei haba la leh stad palat u briew ia ki kam jong U Blei, u Blei un sa pynwai noh ia kane ka pyrthei.Kumjuh ruh,”Haba la synshar ki khynnah ia ki rangbah,kam slem shuh ka pyrthei ka la jan wai.Haba peit mynta te,la ishyrkhei bha.Ki Rangbah bad tymmen ki shah synshar kylla ha ki khyllung ki khynnah.Ha ka jingshisha,dei ki Kmie ki kpa kiba synshar bad pyniaid ia la ki khun ki ksiew.Hynrei mynta pat, kalong pynban da khongpong.Dei pynban ki khun ki ksiew kiba la synshar bad pyniaid kylla ia la ki Kmie ki kpa.Ki ju ong,ki khun kidei ban kohnguh bad burom ia la ki Kmie ki kpa bad “Kordit ia ki khun kiba haram ia la ki Kmie ki kpa”.Hynrei mynta pat,(namar ba ki khun ki la kham stad ban ia ki Kmie ki kpa),ki Kmie ki kpa ki hap kohnguh kylla ia la ki khun ki ksiew lajong.Mynta pat,imat,kumba “Kordit pynban ki Kmie ki kpa ki bym kohnguh ia la ki khun”.Haba kumta,phi tharai ba kane ka pyrthei kan dang shan slem? Ki dak ki shin mynta ka pyni shynna ba kane ka pyrthei kam slem shuh ba kan sa wai shen shisha.