SHILLONG, Nailur 28: Ka High Level Committee ban pynkynriah ia ki briew kiba sah ha Them metor ne sweeper lane mynta ka sngi ka la aiti ia ka kaiphot ba pura sha ka Sorkar Jylla, bad hadien b aka HLC ka la dep ban aiti ia kane ka kaiphot ka Sorkar kan sa shim ia ka rai hapoh ka Kynhun Myntri.
Lah ban kdew ba ka jingiakhih ia ka them metor ka la khie biang naduh ka 31 tarik Jymmang 2018 kaba la ktah ruh ia ka suk ka sain ha baroh kawei ka Jylla, bad hadien kane na ka liang ka Sorkar ka la thaw ia ka High Level Committee ban wad ia ki lad na ka bynta ban weng ia ka jingeh na katei ka jaka, khamtam hadien ba la mih ka jingdawa ba dei ban pynkynriah noh ia ki briew kiba sah ha katei ka jaka.
U Chairman ka HLC uba dei ruh u Symbud Myntri Rangbah ka Jylla, u Bah Prestone Tynsong u la ong ba ka Sorkar kan sa bishar ia katei ka jinglap jong ka HLC bad kan sa pule bniah ruh ban rah ban shim ia ka rai hapoh ka Kynhun Myntri.
Haba kylli, u Bah Prestone u la kyntait ban ong eiei halor katei ka kaiphot hynrei u la ong ba kaba sah mynta ka long ha ka Sorkar ban shim rai.
