Da i Babu Kular Khongjirem
Ka long kaei kaei kaba itynnad bha mynta ba,ki ar(2) tylli ki bor pyniaid(administration) khamtam kiba pyniaid ia ka Sor Shillong,kata, ka bor pyniaid jong ka District Council(KHADC) bad ki bor pyniaid ki kam pynroi sor,kata,ka Shillong Municipality Board(SMB)ne ka Urban Affairs jong ka sorkar jylla ki la ia tyngkhuh mynta khamtam ha ka jingiadei bad ki nongdie bad nongtyrwa sha ha sor bah Khyndailad(Police Bazar),Shillong.Ha KHADC la pyniaid bad synshar da ka Voice of People Party(VPP) bad ka Shillong Municipality Board(SMB) pat ka hap hapoh ka State Govt.hapoh ka Urban Affairs Dept.jong ka sorkar jylla hapoh ka sorkar MDA-II ba la lamkhmat da ka party NPP,UDP,etc. Dang khyndiat sngi mynta,ki babu sorkar(Officials) na ka SMB ki la wan leh khla ne leh ba heh ban wan iuhroit ne leh bein bad leh donbor pyrshah ia ki trai ri trai muluk kiba ju im ban kamai jakpoh hok kum ki nongdie tyrwa sha lynti, diebsoh ha shang kiba ju kamai kyndoi jakpoh ha kylleng ka sor Khyndailad ne Police Bazar man ka sngi.Kito pat ki nongtyrwa soh ne nongtyrwa sha lynti kiba la pyneh ia ki nongpyniaid ka SMB kiba pli, ki la shah knieh ia ki shang die soh, ki shang buh jingbam dihsha jongki nalor ki ketli ne teapot jongki.Kaba kham ithamula shuh shuh kalong ba ki nongdie soh ki la ia bud bad leit tynruh nakhmat nakhmat ki heh Municipal bad ki la leit ai ka shang bad ki soh hynrei kine ki Heh Municipal ki iaid ba heh khlem salia ne pyrwa ei ei la i kumba kat ki ym don shuh ha kane ka pyrthei.Ki ia ong baroh baroh ba shisien ba la ioh long ba heh hi ki para Khasi, ka jingsarong jongki ka kiew haduh shynrong khlieh syndon.Ki pyrkhat ba namar ba ki biang ia lade, kumta,ki pyrkhat ba ki nongtyrwa soh ruh ki dei kiba bit ba biang kum ma ki.Kata, kam long satia kumta.Lada ki beh ne khang ia ki nongtyrwa sha ne nongdie soh ha shang,ki dei ban beh lem ia kito ki ‘khar tyrwa die jain patlun,jain coat kiba ju tyrwa kylleng ki lynti ki syngkien.Ki ‘khar tyrwa die mobile, die tiar laiphew jait dei ban pynher krad lem ia ki namar ki tyrwa satah klak kylleng ki lynti ka Sor Shillong.Balei ka Municipality ka peit khmat bad nion beit(target) tang ia ki trai ri trai muluk lajong? Don aiu ha lyndet jong kane? Hato! Namar ba ki trai muluk kidei kiba duk kiba toi kim ioh ei ei ban pynbam sbai rupa narieh narieh kumba leh ki khyllah jait ia ki? Na kata ka daw,ki shah leh bein,leh shilliang bad beh bein ia ki kum ki miaw kum ki ksew?Hato! Kim don hok seh ban ia kamai kajih lem ha kane ka ri lajong? Lada dei ha Iewduh(Bara bazar) ne ha Khyndailad(Police Bazar), kam pher ei ei ki don kajuh ka Hok ban kamai kumba kamai lem ki riewspah khlem don jingiapher ei ei ruh em.Tangba,kiba duk,ki kamai rit ne kamai duk,katba kiba riewspah pat ki kamai heh ne kamai riew spah.
Kumba ngi ia tip paidbah, ha Iewduh(Bara Bazar),ka bor synshar ka hap hapoh ka jingsynshar u Syiem Mylliem bad,ka District Council ka don ka bor halor jongka namar ka dei ka jaka riewlum ne jaka Khasi(schedule Areas), hynrei ka Khyndailad pat kam hap satia hapoh ki bor pyniaid ka District Council(Non schedule Areas) namar ka dei ka European Wards ne jaka sorkar bad kane ka jaka ka hap beit hapoh ka jingpyniaid ka sorkar jylla hapoh ka Municipality ne ka Urban affairs.Dei na kata ka daw ba ki nongialam ka VPP naduh u President Rangbah jongka, u Chairman,ki EMs ka KHADC kiba la ia leit jngoh ban ia kynduh ia ki nongtyrwa sha lynti ne nongtyrwa soh ha shang ha Khyndailad(Police Bazar) ha kine ki sngi dang shen, kim da nud than eh ban tuklar ne pyni bor hynrei ki shu ong ba,lada ka Sorkar jylla(Municipality) ki nud ban khang ne beh biang ia ki nongtyrwa sha lynti ne nongtyrwa ne die soh lynti, ngin sa ia peit kaei kaban jia hadien.
Hynrei,ki bor pyniaid jong ka KHADC ki la dep ia tyngkhuh lypa (clashes of powers of administration) bad ki bor pyniaid jong ka Municipality.Ngi la iohi ha kine ki bnai ba la dep ba ki Scheme pynroi(developmental Schemes) jong ki MDC ha Sor ruh ki la shah ktah ne ia tyngkhuh bad buh jingeh hapdeng ka KHADC bad ka Municipality.Ka Municipality ka la pyneh hi triang ban ioh pyntreikam ia ki Scheme ba la ai ne long trai ki MDC ha KHADC lyngba ka Finance Commission kiba dei ha Sor Shillong.Ki MDC ki hap ban kohnguh ne pyndem ia ki bor jong ka Municipality tang ban ioh leh ia ki kam pynroi(developmental works) ha ki dong ne ki shnong bapher bapher jong ka Sor Shillong.Ki jingpynkhuid ia ki jaboh-jabain kylleng ka sor ruh,la pynkhuid da ka Municipality ym dei da ka District Council.Lada jia ba ka Municipality kim kohnguh ne ialeh pyrshah biang mynta ia ki kam nongdie jingdie ha Khyndailad ne Police Bazar,kaei kaban jia nangne shakmat? Tangba,lada jia ba ialeh ki Hati,ki ban iap ki dei ki phlang(ki ‘riew paidbah).
