Pynsangeh shuwa ïa ki program sorkar kum ka Dak ban burom ïa ki ba ïap : PT Sawkmie

Shillong: U Bah P.T Sawkmie, MLA barim hynne ka sngi u la ong ba ka sorkar ka la dei ban pynsangeh shuwa ia ki prokram sorkar baroh kum ka dak ban burom ia ka jingkhlad noh ki nongbylla tih dewiong hapoh krem dewiong, kaba la jia ha East Jaintia Hill District.
“Kane ka dei ka jingjia kaba sngew shyrkhei bad sngewsynei ia kito kiba la ngat ha kane ka apot, khamtam kito kiba don ka jingiadei kaba ia jan bad ki,” ong u bah Sawkmie.
U la bynrap, “Kane ka jingiap mynta ka dei kaba buntam ha kaba da ki phew ngut la lap ia ki met iap bad ki pulit ki dang suba ba lah ba kin dang don shuh kiba iap.”
Kumta haba ia dei bad kane ka jingjia basngewih u bah Sawkmie u la phah ia ka khubor sngewlem sha kiba haiing hasem, sha kiba don jingiadei bajan bad kine baroh.
Ha kajuh ka por u kyrpad ia ka sorkar jylla bad ia ka sorkar pdeng ba ka dei ban wad ki lad ki lynti kumno ban pynsangeh syndon ia kane ka jingtih dewiong be-aiñ.
Kumba shu kdew kane ka jingjia basngewsih ka la jia ha ka shnong Thangsko, East Jaintia Hill bad tad haduh mynta ka sngi Thohdieng ka jingiap ka la kiew sha ka 25 ngut.